تحديث الصفحة أيا وهذه الظاهرة واش تقولو فيها؟؟

لسلام عليك ورحمة الله
كيف حوالكم؟؟؟
اليوم زدت رصدتلكم ظاهرة أخرى من الظواهر لي تزخر بيها بلادي
وراني حاب نعرف رايكم فيها:

ما رانيش رايح نتكلم على المارشيات ( الأسواق)
الحكاية تصرا في وسائل النقل يعني الطرونسبور:

نحكيلكم باحتصار:

واش رايكم كي يكونو الأماكن فارغين (سورتو في القطار وين الكراسى على ريسانهم)
وتجي بنت تقعد في مكان فيه زوج كراسى فارغين

وتجي موراها بنت ثانية تقعد معاها ، باش يتوانسو ويجوزو الوقت كيف كيف
وبسرعة مخلوفي يجي واحد البنادم ما تعرفش منين طاح يقعد ويخليها en attente،
والمشكل أنو البلايص كاينين

ولي قالتلهم أرقدو واحد النهار كنت في train، حكمت بلاصة قدام التاقة،
دخلت واحد المرأة كبيرة وزوج نساء معها، بداو يحوسو على 4 كراسى متقابلين باش يقعدو a l'aise،
(لوكان ما لقاوش كنت نعطيلهم بلاصتي: احم احم خوكم يفهم ومن جهة أخرى مخصوص دعاوي الخير)

المهم سطالاو، وبداو يقصرو بيناتهم

حتى زدم عليهم قدور بوفهامة:
خلى كامل الكراسي الفارغين ولي فيهم الرجال والذراري والصاشيات وما لقا غير هاذ المخلوقات باش يديرونجيهم

مع لول هوما ما فهمو والو
سكتو وبقاو ساكتين يسناو فيه يفهم روحو
والسيد قاتلاتو البسالة ما حبش يتزحزح من بلاصتو

ياسبحان الله كيما كاين هدرة بين الولاد كي يجو البنات يقادروهم ويسكتو
كاين هدرة تاع النساء يحشمو يهدروها قدام الرجال

المهم وحدة منهم ما قدرت تشد، وديمارات:
فلانة تخطبت، وفلانة تزوجت، وجارتها رفدت وسلفتها ولدت، بلا ما نحكيلكم على التفاصيل
وهو قاااااعد ولوكان ماكاش بلايص نجوزوها، يدير روحو ما سمعش وخلاص:

السؤال لي حبيت نطرحهولكم:
كيفاش تشوفو الراجل لي يخلي بلاصتو مع الرجال ويجي يزاحم في النساء؟؟؟
وهل هو يرضى تكون يماه وختو قاعدين ويجي واحد يزاحمهم؟؟؟؟

إليكم الخط

سلامي